नवलपरासी- मङि्सर २२ गते।
नवलपरासी बर्दघाट सुस्ता पूर्व नवलपुरमा बस र ट्रक आपसमा ठोक्किँदा १७ जना घाइते भएका छन् ।
पूर्व पश्चिम राजमार्गअन्तर्गत जिल्लाको विनयी त्रिवेणी गाउँपालिका–१ विनयी खोला नजिक आज बिहान ५ बजे बस र ट्रक एकापसमा ठोक्किएको थियो । बागलुङबाट भैरहवाका लागि छुटेको लु१ख ४६७० नम्बरको बस र पश्चिमबाट छुटेको लु२ख ८९३ नम्बरको ट्रक एकापसमा ठोक्किँदा दुर्घटना भएको जिल्ला प्रहरी कार्यालयले जनाएको छ।
घाइतेमध्ये दुईजनाको अवस्था गम्भीर रहेको छ । घाइतेको मध्यविन्दु जिल्ला अस्पताल डण्डामा उपचार भइरहेको छ । बसमा ३० जना सवार रहेकोमा अन्य यात्रु भने सकुसल रहेका प्रहरीले जनाएको छ । बस र ट्रक ठोक्किएपछि अहिले उक्त स्थानमा एकतर्फरूपमा मात्रै यातायात सञ्चालन भएको छ । दुर्घटनामा परेका सवारी हटाएपछि मात्र दुईतर्फीरूपमा सवारी सञ्चालनमा आउने प्रहरीले बताए ।
