बाँके चैत २१ गते ।
सशस्त्र प्रहरी बल नेपाल ३० नम्बर गण बागेश्वरी हेडक्वाटर बाँकेले आफ्नो १८औं स्थापना दिवस भव्यताका साथ सम्पन्न गरेको छ। नेपालगञ्ज उपमहानगरपालिका वडा नम्बर १४ स्थित गणको परिसरमा आयोजना गरिएको कार्यक्रममा सशस्त्र प्रहरी बल नं. ५ विन्ध्यवासिनी बाहिनी प्रमुख डीआईजी प्रदीप कुमार पाल प्रमुख अतिथि रहेका थिए। नेपालगञ्जका मेयर प्रशान्त बिष्ट विशेष अतिथि तथा सशस्त्र प्रहरी बल नेपाल ३० नम्बर गण बागेश्वरी हेडक्वाटरका गणपति एसपी शोभाकान्त खनालको अध्यक्षतामा कार्यक्रम सम्पन्न भएको हो।
कार्यक्रमलाई सम्बोधन गर्दै प्रमुख अतिथि डीआईजी पालले देश र जनताको सुरक्षाका लागि सशस्त्र प्रहरी बलले खेलेको भूमिकाको उच्च प्रशंसा गरे। उनले सीमा सुरक्षा, आन्तरिक सुरक्षा तथा राजस्व संकलनलाई प्रभावकारी बनाउन संगठनले देखाएको प्रतिबद्धता सराहनीय रहेको बताए। डीआईजी पालले सशस्त्र प्रहरी बल नेपाल ३० नम्बर गण बागेश्वरी हेडक्वाटर बाँकेले उच्च मनोबलका साथ राज्यले दिएको जिम्मेवारी पूरा गरिरहेको उल्लेख गर्दै भावी दिनहरूमा अझ प्रभावकारी रूपमा काम गर्न निर्देशन दिए।
विशिष्ट अतिथि नेपालगञ्जका मेयर प्रशान्त बिष्टले सशस्त्र प्रहरी बलले जिल्लाको शान्ति सुरक्षा, सीमा सुरक्षा तथा विपद् व्यवस्थापनमा खेलेको भूमिकाको प्रशंसा गर्दै आगामी दिनहरूमा अझ सशक्त रूपमा योगदान दिन आवश्यक रहेको धारणा राखे। उनले स्थानीय सरकार र सुरक्षा निकायबीचको समन्वयले आम नागरिकलाई सुरक्षित महसुस गराउन महत्त्वपूर्ण भूमिका खेल्ने बताए।
गणपति एसपी शोभाकान्त खनालका अनुसार स्थापना दिवसको अवसरमा शहिद परिवारलाई दोसल्ला ओढाएर सम्मान गरिएको थियो। साथै, उत्कृष्ट कार्य सम्पादन गर्ने तथा विभिन्न खेल प्रतियोगितामा प्रथम हुने सशस्त्र प्रहरी कर्मचारीहरूलाई पुरस्कार तथा प्रमाणपत्र वितरण गरिएको थियो। २०८१ सालमा अवकाश प्राप्त गरेका सशस्त्र प्रहरी कर्मचारीहरूलाई पनि विशेष सम्मान प्रदान गरिएको थियो।
स्थापना दिवसको अवसरमा विविध साँस्कृतिक कार्यक्रमहरू समेत प्रस्तुत गरिएको थियो। कार्यक्रममा शहिद परिवार, पूर्व सशस्त्र प्रहरी, गण तथा मातहत इकाइमा कार्यरत सिनियर अधिकृत, जुनियर अधिकृत तथा जवानहरूको उल्लेखनीय उपस्थिति रहेको थियो।
सशस्त्र प्रहरी बल नेपाल ३० नम्बर गण बागेश्वरी हेडक्वाटर बाँकेले स्थापना कालदेखि नै सीमाको सुरक्षामा महत्वपूर्ण भूमिका खेल्दै आएको छ। यस गणले आपतकालीन उद्धार तथा विपद् व्यवस्थापनमा समेत महत्त्वपूर्ण योगदान पु¥याउँदै आएको छ। सुरक्षा व्यवस्थालाई अझ सुदृढ बनाउन गणले आगामी दिनहरूमा अझ प्रभावकारी कदम चाल्ने प्रतिबद्धता जनाएको छ।
कार्यक्रमको अन्त्यमा सशस्त्र प्रहरी बल नेपाल ३० नम्बर गण बागेश्वरी हेडक्वाटर बाँकेका गणपति एसपी शोभाकान्त खनालले उपस्थित सम्पूर्ण अतिथि, सुरक्षाकर्मी तथा अन्य सहभागीहरूलाई धन्यवाद ज्ञापन गर्दै संगठनको लक्ष्य प्राप्तिमा सबैको सहयोग अपरिहार्य रहेको बताए।
