बाँके, चैत २० गते ।
सशस्त्र प्रहरी बल नेपाल, बाँकेले पछिल्लो फागुन महिनाको अवधिमा १ करोड ७७ लाख रुपैयाँ बराबरको अवैध सामग्री बरामद गरेको छ। सशस्त्र प्रहरी बल नेपाल ३० नम्बर गण बागेश्वरी हेडक्वाटरका प्रमुख सशस्त्र प्रहरी उपरीक्षक एसपी शोभाकान्त खनालले कमाण्ड सम्हालेको फागुन महिनाको अवधिमा चोरी पैठारी नियन्त्रणबाट १ करोड भन्दा बढीको आबैध सामग्री बरामद गर्न सफल हुनुभएको छ।
सशस्त्र प्रहरी बल ५ नं. विन्ध्यावासिनी बाहिनी, रुपन्देही मातहतको सशस्त्र प्रहरी ३० नं.गण बागेश्वरी बाँकेले सीमा क्षेत्रमा भइरहेको अवैध गतिविधि नियन्त्रणमा उल्लेखनीय सफलता हासिल गरेको छ। सशस्त्र प्रहरी बाँकेमा हाल प्रमुखमा एसपी शोभाकान्त खनाल कार्यरत छन् ।
नेपाल-भारत खुला सीमाका कारण तस्करीका गतिविधि बढ्दै गइरहेका छन्। तर, सशस्त्र प्रहरी बल बाँकेले सीमा क्षेत्रमा प्रभावकारी निगरानी गर्दै आएका कारण पछिल्लो समयमा ठूलो परिमाणमा अवैध सामग्री नियन्त्रणमा लिन सफल भएको छ। ६५ किलोमिटर लामो सीमा क्षेत्र रहेको बाँकेमा सशस्त्र प्रहरीले विशेष सतर्कता अपनाई गस्ती, जाँच तथा निगरानीलाई थप प्रभावकारी बनाएको छ।
सशस्त्र प्रहरीले बरामद गरेका सामग्रीहरूमा लत्ता-कपडा, हार्डवेयर सामग्री, एंड्राइड मोबाइलका पार्ट,बोइलर कुखुरा माछा तथा अन्य विभिन्न किसिमका अवैध रूपमा ओसारपसार गरिएका सामानहरू रहेका छन्। विशेष सुरक्षा रणनीति अपनाउँदै, सशस्त्र प्रहरी निरीक्षकको कमाण्डमा ३५ जना प्रहरी टोली २४ घण्टा सीमा क्षेत्रमा निगरानी गरिरहेका छन्। साथै, भारतीय एसएसबी (सशस्त्र सीमा बल) तथा सशस्त्र प्रहरी बल नेपालबीच सहकार्य गर्दै नियमित गस्ती सञ्चालन भइरहेको छ।
सशस्त्र प्रहरी बल ५ नं.विन्ध्यावासिनी बाहिनी रुपन्देहीका सूचना अधिकारी एसएसपी कमलप्रसाद तिमिलसेनाले लिमरा खबरलाई दिएको जानकारी अनुसार, पछिल्लो समय सशस्त्र प्रहरी बाँकेले अवैध तस्करी नियन्त्रण अभियानलाई थप प्रभावकारी बनाएको छ। उनले भने, बरामद गरिएका सबै सामग्रीहरू आवश्यक कानुनी प्रक्रिया पूरा गरी नेपालगञ्ज भन्सार कार्यालयमा बुझाइएको जानकारी दिए।
सशस्त्र प्रहरी बल बाँकेको पछिल्लो विवरण अनुसार, फागुन महिनाको अवधिमा अवैध सामग्री बरामद गर्ने जिल्लाहरूमध्ये बाँके पहिलो स्थानमा रहेको छ। सीमा क्षेत्रमा हुने अवैध ओसारपसार तथा तस्करी नियन्त्रणका लागि बाँके जिल्लामा गस्ती, जाँच तथा निगरानीलाई थप प्रभावकारी बनाइएको छ।
नेपाल-भारत खुला सिमानाका कारण तस्करीका घटना बढ्न सक्ने सम्भावना उच्च भए पनि सशस्त्र प्रहरी बल बाँकेको निरन्तर निगरानी तथा कारबाहीका कारण तस्करी नियन्त्रणमा महत्वपूर्ण सफलता प्राप्त भइरहेको छ।
सशस्त्र प्रहरीले आधुनिक प्रविधिको प्रयोग गर्दै सूचना संकलन तथा निगरानीलाई प्रभावकारी बनाएको छ। स्थानीय जनसहभागिता बढाउँदै, तस्करी नियन्त्रणका लागि विशेष रणनीति अपनाइएको छ। गस्ती तथा जाँचमा कड़ाई गरिँदै आएको छ।
सशस्त्र प्रहरी बल नेपाल बाँकेले जनताको सुरक्षाका लागि दिनरात खटेर कार्य गरिरहेको छ। अवैध गतिविधिहरू नियन्त्रण गर्न सशक्त कदम चालिरहेको जानकारी दिँदै एसएसपी तिमिलसेनाले सीमा क्षेत्रमा सुरक्षा व्यवस्थालाई अझ मजबुत बनाइने बताएका छन्। साथै, सशस्त्र प्रहरी बल नेपाल बाँकेले अवैध गतिविधि नियन्त्रणमा आफ्नो भूमिका अझ प्रभावकारी बनाउँदै लैजाने प्रतिबद्धता व्यक्त गरेको छ।
