बाँके चैत १९ गते।
गत शुक्रबार काठमाडौंको तीनकुनेमा राजावादीको आन्दोलनका क्रममा पत्रकारमाथि भएको आक्रमण, दुर्व्यवहार, सञ्चारगृहमा आगजनी तथा तोडफोडको विरोधमा नेपाल पत्रकार महासंघले सरकारलाई ज्ञापनपत्र बुझाएको छ।
नेपाल पत्रकार महासंघ केन्द्रीय समितिको आह्वानमा देशभरका पत्रकार आन्दोलित भइरहेका छन्। सोही क्रममा बाँके जिल्लामा पनि महासंघको नेतृत्वमा पत्रकारहरूले प्रमुख जिल्ला अधिकारीमार्फत सरकारलाई ज्ञापनपत्र बुझाएका छन्। नेपाल पत्रकार महासंघ बाँके शाखाका अध्यक्ष नविन गिरीको नेतृत्वमा मंगलबार दिउँसो सहायक प्रमुख जिल्ला अधिकारी खडानन्द खत्रीलाई ज्ञापनपत्र बुझाइएको हो।
गत चैत १५ गते काठमाडौंको तीनकुने क्षेत्रमा भएको राजावादीको आन्दोलन हिंसात्मक बन्दा पत्रकार एवं सञ्चारमाध्यमहरू आक्रमणको निशानामा परेका थिए। उक्त घटनामा एभिन्यूज टेलिभिजनका पत्रकार रजकको आगलागीमा परेर निधन भएको थियो।
अन्नपूर्ण पोष्ट दैनिकको कार्यालयमा आगजनी गरी क्षति पुर्याइएको थियो भने कान्तिपुर टेलिभिजनको भवनमा ढुंगामुढा गरिएको थियो। त्यस्तै, हिमालयन टेलिभिजनको सवारीसाधनमा तोडफोड गरिएको थियो। सोही घटनामा पत्रकार दिनेश गौतम घाइते भएका थिए भने फोटो पत्रकार निरज तामाङको क्यामेरा हराएको थियो। नेपाल पत्रकार महासंघले घटनाप्रति गम्भीर ध्यानाकर्षण भएको जनाएको छ।
नेपाल पत्रकार महासंघले हिंसात्मक घटनामा ज्यान गुमाएका पत्रकारको हत्या प्रकरणको गहिरो अनुसन्धान गरी दोषीलाई फौजदारी अभियोगमा कारबाही गर्न माग गरेको छ। साथै, मृतक पत्रकारको परिवारलाई क्षतिपूर्ति प्रदान गर्न, सञ्चारमाध्यम तथा सञ्चारकर्मीमाथि आक्रमण गर्नेहरूलाई कानुनी कठघरामा उभ्याउन, क्षति पुगेका सञ्चारगृहलाई उचित क्षतिपूर्ति दिन र घाइते पत्रकारहरूको उपचारको व्यवस्था गर्न महासंघले आग्रह गरेको छ।
महासंघले सरकारलाई आफ्ना माग पूरा गर्न सात दिनको अल्टिमेटम दिएको छ। यदि सो समयमा मागहरू पूरा नभए महासंघ चरणबद्ध आन्दोलनमा उत्रिने चेतावनी दिएको छ।
ज्ञापनपत्र बुझ्दै सहायक प्रमुख जिल्ला अधिकारी खडानन्द खत्रीले सो ज्ञापनपत्र प्रधानमन्त्री कार्यालय लगायत सम्बन्धित निकायमा पठाइने प्रतिबद्धता जनाएका छन्।
ज्ञापनपत्र बुझाउने क्रममा नेपाल पत्रकार महासंघ लुम्बिनी प्रदेशका अध्यक्ष शुक्रऋषि चौलागाईँ, महासंघ बाँकेका पूर्व अध्यक्षहरू नीरज गौतम, झलक गैरे, नेपाल प्रेस युनियन बाँकेका अध्यक्ष प्रियास्मृति ढकाल, प्रेस चौतारी बाँकेका अध्यक्ष कमल डाँगी लगायत विभिन्न सञ्चारगृहमा कार्यरत पत्रकारहरूको उपस्थिति रहेको थियो।
