बाँके चैत १६ गते ।
नेपाल पत्रकार महासंघ बाँकेको आयोजनामा आज नेपालगन्जस्थित बीपी चोकमा पत्रकारहरूमाथि भएका आक्रमणको विरोधमा विरोधसभा सम्पन्न भएको छ। पत्रकारको हत्या र सञ्चारमाध्यममाथिको तोडफोडविरुद्ध देशभर एक्यबद्धता जनाउँदै विभिन्न जिल्लामा विरोध प्रदर्शनहरू भइरहेका छन्।
राजतन्त्रवादीहरूको आन्दोलनका क्रममा एकजना पत्रकारको हत्या हुनुका साथै विभिन्न सञ्चारगृहमा तोडफोड र आतंक मच्चाइएको घटनाप्रति पत्रकारहरूले तीव्र विरोध जनाएका छन्। नेपाल पत्रकार महासंघको अगुवाइमा काठमाडौंसहित देशभरका विभिन्न जिल्लामा विरोधसभा र प्रदर्शनको आयोजना गरिएको हो।
नेपालगन्जमा नेपाल पत्रकार महासंघ बाँके शाखाले विरोधसभा आयोजना गर्यो। उक्त सभामा महासंघ लुम्बिनी प्रदेशका अध्यक्ष शुक्रऋषी चौलागाईंले पत्रकारमाथिको आक्रमण प्रेस स्वतन्त्रतामाथिको गम्भीर आक्रमण भएको बताउँदै दोषीलाई कारबाहीको दायरामा ल्याउन सरकारलाई दवाव दिनुपर्ने आवश्यकता औंल्याए। उनले भने, “पत्रकारहरूको हत्या र सञ्चारमाध्यममाथि गरिएको आक्रमण लोकतन्त्र विरोधी गतिविधि हो। दोषीलाई तत्काल कानुनी कठघरामा उभ्याइनुपर्छ।”
नेपाल पत्रकार महासंघ बाँकेका अध्यक्ष नविन गिरीले सरकारलाई प्रेस स्वतन्त्रताविरुद्ध कुनै कदम चाल्ने अधिकार नभएको स्पष्ट पार्दै घटनामा संलग्न दोषीलाई तत्काल कानुनी कारबाही गर्न चेतावनी दिए। उनले पत्रकारहरूको सुरक्षा राज्यको प्रमुख जिम्मेवारी रहेको बताउँदै सरकारको लापरबाहीलाई गम्भीर रूपमा लिनुपर्ने बताए।
प्रेस चौतारी बाँकेका अध्यक्ष कमल डाँगी, नेपाल प्रेस युनियन बाँके अध्यक्ष प्रिया स्मृति ढकाललगायतका पत्रकार नेताहरूले सञ्चारमाध्यममाथि भएको आक्रमणलाई गम्भीर रूपमा लिएर दोषीलाई हदैसम्मको सजाय दिन माग गरे। उनीहरूले प्रेस स्वतन्त्रताको रक्षा गर्न पत्रकारहरू एकजुट हुनुपर्नेमा जोड दिए।
काठमाडौंमा सञ्चारकर्मीहरूले माइतीघर मण्डलामा प्रदर्शन गरेका छन्। नेपाल पत्रकार महासंघका अध्यक्ष विपुल पोखरेलले पत्रकारहरूको सुरक्षा सरकारले सुनिश्चित गर्नुपर्नेमा जोड दिंदै भने, “प्रेस स्वतन्त्रताको रक्षा गर्न हामी कुनै पनि कदम चाल्न पछि पर्ने छैनौं।” उनले दोषीहरूलाई कडा कारबाही गर्न सरकारलाई आग्रह गरे।
आज नेपाल पत्रकार महासंघको स्थापना दिवस भए पनि महासंघले पूर्वनिर्धारित कार्यक्रम स्थगित गर्दै देशभर प्रदर्शन आयोजना गरेको हो। महासंघको केन्द्रीय समितिले घटनामा संलग्न दोषीलाई कानुनी कठघरामा उभ्याउन माग गर्दै प्रेस स्वतन्त्रताको रक्षा गर्न सरकारलाई सचेत गराएको छ।
पत्रकारहरू माथि भएको आक्रमणको विरोधमा नेपालगन्जमा देखिएको एक्यबद्धताले प्रेस स्वतन्त्रताको महत्वलाई पुनः स्थापित गरेको छ। सञ्चारमाध्यमको सुरक्षा सुनिश्चित गर्न सरकारको सक्रियता आवश्यक रहेको विभिन्न वक्ताहरूले उल्लेख गरे।
