मंसूर अली इद्रिशी
नेपालगंज चैत १३ गते-भारतीय सिमावर्ती क्षेत्र सिपराबाट अवैध रूपमा भन्सार छलि चोरी पैठारी गरी ल्याउँदै गरेको भारतीय ब्रोइलर कुखुरा र दुई वटा मोटरसाइकल प्रहरीले नियन्त्रणमा लिएको छ। साइगाउँ प्रहरी चौकीका प्रहरी वरिष्ठ नायब निरीक्षक हरिबहादुर खड्का तथा जिल्ला प्रहरी कार्यालय बाँकेका प्रहरी वरिष्ठ नायब निरीक्षक नदिराम खड्काको संयुक्त टोलीले नेपालगंज उपमहानगरपालिका-१७, परसपुर अक्सिजन फ्याक्ट्री नजिकैबाट कुखुरा र मोटरसाइकल पक्राउ गरेको हो।
प्रहरीका अनुसार, विशेष सूचनाका आधारमा अवैध रूपमा कुखुरा बोकेर आइरहेका दुई मोटरसाइकल चालक प्रहरीलाई देखेर फरार भएका थिए। त्यसपछि प्रहरीले मोटरसाइकलसहित कुखुरा नियन्त्रणमा लिएको थियो। पक्राउ परेका सामग्रीहरूलाई आवश्यक कानुनी प्रक्रियाका लागि जिल्ला प्रहरी कार्यालय बाँकेमा पठाइएको थियो।
बाँके प्रहरीका अनुसार बरामद गरिएको ब्रोइलर कुखुरा तथा दुई मोटरसाइकलको अनुमानित बजार मूल्य १ लाख २५ हजार ६ सय रुपैयाँ रहेको छ। यस्तै, बरामद गरिएका कुखुरा र मोटरसाइकललाई थप कारबाहीका लागि पशु क्वारेन्टाइन कार्यालय, नेपालगंजमा बुझाइएको छ। फरार भएका व्यक्तिहरूको पहिचान तथा खोजी कार्य तीव्र पारिएको जिल्ला प्रहरी कार्यालय बाँकेका प्रमुख प्रहरी उपरीक्षक (एसपी) तुलबहादुर कार्कीले जानकारी दिए।
पशु सेवा ऐन, २०५५ को धारा १२ अनुसार कुनै पनि प्रकारका पशुजन्य उत्पादन नेपाल ल्याउन क्वारेन्टाइन अनुमति लिनुपर्ने अनिवार्य व्यवस्था छ। साथै, धारा १८ अनुसार यदि कोही बिना स्वीकृति मासुजन्य वस्तु ल्याएको पाइएमा ती सामान जफत गरिन्छ। साथै संलग्न व्यक्तिलाई १० हजार रुपैयाँसम्म जरिवाना वा १ वर्षसम्म कैद सजाय हुनसक्छ।
भारतबाट अवैध रूपमा कुखुरा भित्र्याउनु पशु स्वास्थ्यका दृष्टिकोणले पनि जोखिमपूर्ण हुने विज्ञहरूको भनाइ छ। विदेशबाट भित्रिने मासुजन्य वस्तुमा रोगजन्य भाइरस तथा ब्याक्टेरियाको जोखिम हुने भएकाले सरकारले कानुनी व्यवस्था अनिवार्य गरेको हो।
नेपालगंज क्षेत्रमा अवैध रूपमा तस्करी बढ्दै गएको भन्दै स्थानीय व्यापारीहरू तथा व्यवसायीहरूले चिन्ता व्यक्त गरेका छन्। कुखुरा व्यवसायी मञ्च बाँकेका अध्यक्ष धर्मराज पोखरेलले जिल्ला प्रहरी कार्यालय बाँकेलाई धन्यवाद दिँदै अवैध तस्करी रोक्न थप कडाइ गर्न आग्रह गरे।
बाँके प्रहरीले अवैध तस्करी रोक्न सीमा क्षेत्रमा थप कडाइ गर्ने प्रतिबद्धता व्यक्त गरेको छ। प्रहरीले स्थानीयहरूलाई तस्करी नियन्त्रणमा सहयोग गर्न आग्रह गर्दै अवैध कारोबार देखिएमा तत्काल जानकारी गराउन अपील गरेको छ।
