बाँके, चैत १२ गते ।
भारतको सिपरा बाट भन्सार छल्दै चोरी पैठारी गरी ल्याइएको ब्रोइलर कुखुरा सहित मोटरसाइकल प्रहरीले बरामद गरेको छ। जानकी गाउँपालिका वडा नम्बर २ बेलभारस्थित प्रहरी चौकी बेलभारबाट खटिएको प्रहरी सहायक निरीक्षक प्रेम सिंह कठायतको टोली तथा प्रहरी चौकी साइगाउँबाट प्रहरी वरिष्ठ नायब निरीक्षक हरि बहादुर खड्काको संयुक्त टोलीले अवैध ब्रोइलर कुखुरा सहित मोटरसाइकल नियन्त्रणमा लिएको हो।
प्रहरीका अनुसार, चोरी पैठारी गरेर ल्याइएको भारतीय नम्बर प्लेट भएको यूपी ४० एए ३१७९ नम्बरको मोटरसाइकलमा ब्रोइलर कुखुरा राखेर तस्करी हुँदै गर्दा सुराकीका आधारमा प्रहरीले निगरानी बढाएको थियो। प्रहरीको उपस्थिति देखेपछि मोटरसाइकल चालक फरार भएका थिए। सो क्रममा प्रहरीले अन्दाजी एक क्विन्टल ब्रोइलर कुखुरा तथा मोटरसाइकल बरामद गरेको छ।
जिल्ला प्रहरी कार्यालय बाँकेका प्रमुख प्रहरी उपरीक्षक (एसपी) तुलबहादुर कार्कीका अनुसार अवैध ब्रोइलर कुखुरा सहित मोटरसाइकलको अनुमानित मूल्य ४८ हजार रुपैयाँ रहेको बताएका छन्। बरामद गरिएका ब्रोइलर कुखुरालाई आवश्यक कारवाहीका लागि पशु क्वारेन्टाइन कार्यालय नेपालगन्ज, बाँके पठाइएको छ।
यसै क्रममा, अवैध रूपमा तस्करी गर्ने व्यक्ति फरार रहेकाले प्रहरीले उनको खोजी कार्य तीव्र बनाएको छ। प्रहरी स्रोतका अनुसार, सीमावर्ती क्षेत्रमा सक्रिय केही चर्चित तस्करहरू यस्ता तस्करीमा संलग्न रहेको अनुमान गरिएको छ।
सीमा क्षेत्रमा भइरहेको बढ्दो अवैध व्यापार नियन्त्रण गर्न बाँके प्रहरी प्रमुख एसपी कार्कीले सिमा नजिकका प्रहरी चौकीहरूलाई थप सतर्क रहन कडा निर्देशन दिएका छन्। उनले विशेष गरी भारतबाट हुने अवैध तस्करी रोक्न कडाइ गर्नुपर्ने आवश्यकता औंल्याएका छन्।
नेपाल-भारत खुला सिमानाका कारण सीमावर्ती क्षेत्रबाट दैनिक रूपमा विभिन्न अवैध सामग्रीको ओसारपसार भइरहेको पाइन्छ। यस्ता अवैध गतिविधिहरू रोक्नका लागि प्रहरी समय-समयमा निगरानी गर्दै आए पनि केही संगठित चर्चित तस्करहरू चोरी पैठारी गर्ने प्रयास गरिरहेको पाइएको छ।
प्रहरीले यस्ता अवैध कारोबार रोक्नका लागि स्थानीयवासीको समेत सहयोग आवश्यक रहेको बताउँदै, यदि कसैले अवैध रूपमा तस्करी गर्न खोजेमा प्रहरीलाई खबर गर्न अनुरोध गरेको छ। यस घटनाले सीमा क्षेत्रमा चोरी पैठारी तथा अन्य अवैध वस्तुहरूको निगरानी अझै कडा गर्नु पर्ने देखाएको छ। प्रहरीले चोरी पैठारी तथा अवैध तस्करीमा संलग्न व्यक्तिहरूलाई कानुनी दायरामा ल्याउन थप सक्रियता देखाउने बताएको छ।
