बाँके चैत ११ गते ।
बाँकेका प्रमुख जिल्ला अधिकारी (सीडीओ) धर्मराज जोशीले पत्रकार परिचयात्मक कार्यक्रममा जनाउँदै आशिष मल्लको गिरफ्तारी कानुनी प्रक्रिया अनुसार भएको स्पष्ट पारेका छन्। उनले मल्लको पक्राउ पत्रकार भएकै कारण नभइ, कानून अनुसार फरार अभियुक्तको रूपमा खोजी भइरहेको अवस्थामा गरिएको बताएका हुन्।
सीडीओ जोशीका अनुसार आशिष मल्ल बाँके प्रहरीको फरार अभियुक्तहरूको सूचीमा थिए। “उनीमाथि बाँके जिल्ला प्रशासन कार्यालय र जिल्ला प्रहरी कार्यालयमा तीन वटा छुट्टाछुट्टै मुद्दा दर्ता छन्,” उनले भने, “तीमध्ये एक मुद्दामा केही महिनाअघि उनले पाँच हजार रुपैयाँ जरिवाना तिरेर तारिखमा छुट पाएका थिए भने अर्को मुद्दामा उनी फरार अभियुक्तको रूपमा सूचीमा रहेका थिए।”
सो अवसरमा नेपाल पत्रकार महासंघ बाँकेका अध्यक्ष नविन गिरीले पत्रकारिता गर्ने व्यक्ति नै साँचो अर्थमा पत्रकार हुने बताएका छन्। उनले भने, “पत्रकारिता क्रम गर्ने पत्रकार हो, उसले कानुन, आचारसंहिता र सामाजिक उत्तरदायित्वको पालना गर्नुपर्छ।” पत्रकारितामा सत्य, निष्पक्षता र विश्वासको आधारमा काम गर्नुपर्ने उल्लेख गर्दै गिरीले पत्रकारहरूलाई गल्ती गर्ने छुट नभएको स्पष्ट पारे।
उनका अनुसार, पत्रकारले लेख्ने, बोल्ने वा सम्प्रेषण गर्ने प्रत्येक सामग्रीको प्रभाव समाजमा गहिरो रूपमा पर्न सक्छ, त्यसैले जिम्मेवारीपूर्वक काम गर्नुपर्ने हुन्छ। पत्रकारिताको नाममा भ्रम फैलाउने, अफवाह सृजना गर्ने, वा कसैको चरित्र हत्या गर्ने कार्य स्वीकार्य नहुने उनले बताए।
गिरीले डिजिटल युगमा झन जिम्मेवार पत्रकारिताको खाँचो रहेको भन्दै सत्यतथ्यमा आधारित र अनुसन्धानमूलक समाचार उत्पादनमा जोड दिन आग्रह गरे। साथै, पत्रकारको सुरक्षा, स्वतन्त्रता र सम्मान सुनिश्चित गर्न महासंघ सदैव सक्रिय रहने प्रतिवद्धता जनाए।
गएको फागुन २३ गते शुक्रबार धम्बोजी चौकमा आशिष मल्ल ठकुरी लगायतका सञ्चारकर्मीहरूको सहकार्यमा जिल्ला प्रहरी कार्यालयले आयोजना गरेको ट्राफिक व्यवस्थापन र सडक दुर्घटना न्यूनीकरणसम्बन्धी कार्यक्रममा मल्लको उपस्थिति देखिएको थियो। मल्ल फरार थिए भने,सोही कार्यक्रममा सहभागी हुँदा पनि प्रहरीले उनलाई किन ,पक्राउ नगरेको भन्दै सामाजिक सञ्जाल र विभिन्न माध्यमहरूमा प्रश्न उठिरहेको छ।
यस विषयमा सीडीओ जोशीले स्पष्टीकरण दिँदै भने, “प्रहरीले उनीमाथि भएको फरार मुद्दाका आधारमा खोजी गरिरहेको थियो। उनी आफैं सीडीओ अफिसमा आएका थिए, त्यसपछि प्रहरीले त्यहीँबाट नियन्त्रणमा लिएको हो। पत्रकार भएकै कारण पक्राउ गरिएको भन्ने भ्रामक प्रचार गलत हो।”
हाल मल्ललाई सुरक्षित थुनामा राखेर बाँकी मुद्दाहरूमा अनुसन्धान भइरहेको जिल्ला प्रशासन कार्यालयले जानकारी दिएको छ। यता मल्लका आफन्त र समर्थकहरु भने उनको रिहाइको माग गर्दै जिल्ला प्रशासन कार्यालय अगाडि विरोध प्रदर्शनमा उत्रिएका छन्। उनीहरूले सीडीओ कार्यालयको मूल गेटमा नाराबाजी गर्दै मल्ललाई पत्रकारको हैसियतका कारण लक्षित गरी पक्राउ गरिएको आरोप लगाएका छन्।
मल्लका समर्थकहरूले निष्पक्ष अनुसन्धानको माग गर्दै पत्रकारमाथि यसरी गरिएको व्यवहारले प्रेस स्वतन्त्रताको उल्लंघन भएको भन्दै आक्रोश व्यक्त गरेका छन्। प्रशासन र प्रहरीले भने मल्लमाथि कानुनी प्रक्रिया अनुसार अनुसन्धान पूरा नहुञ्जेल कुनै निष्कर्षमा नपुग्न आग्रह गरेका छन्।
जिल्ला प्रशासन कार्यालय बाँकेको आयोजनामा पत्रकार परिचयात्मक कार्यक्रममा जिल्ला प्रहरी कार्यालय बाँकेका प्रमुख एसपी कुलबहादुर कार्की, सशस्त्र प्रहरी बल नेपाल ३० नम्बर बागेश्वरी हेडक्वाटरका गणपति शोभाकान्त खनाल, अनुसन्धानका एसपी नेपाल पत्रकार महासंघ बाँकेका अध्यक्ष नविन गिरी लगायत सुरक्षाकर्मी र सञ्चारकर्मीहरूको उपस्थिति रहेको थियो।
