बाँके, चैत १० गते ।
बाँकेको जानकी गाउँपालिका वडा नम्बर २ बिहानी टोलमा अवैध रुपमा भारत शिपराबाट तस्करी गरी ल्याइएका बोइलर कुखुरा सहित एकजना व्यक्ति पक्राउ परेका छन्।आइतबार बिहान करिब ७:३० बजे, प्रहरी चौकी साईगाउँका इन्चार्ज प्रहरी वरिष्ठ नायब निरीक्षक हरि खड्काको कमाण्डमा खटिएको टोलीले भारत शिपराबाट तस्करी गरी ल्याइएको अन्दाजी १५० केजी अवैध बोइलर कुखुरा सहित एकजनालाई नियन्त्रणमा लिएको हो।
पक्राउ परेका व्यक्ति बैजनाथ गाउँपालिका–५, बनकटुवा निवासी ४० वर्षीय ढोडेप्रसाद थारु रहेका छन्। उनले चलाएको भे.३ प १४७४ नम्बरको मोटरसाइकलमा कुखुरा राखेर नेपाल भित्र्याइँदै गर्दा फेला पारिएको प्रहरीले जनाएको छ। घटनास्थलबाट अर्का एक मोटरसाइकल सवार भने कुखुरा र सवारीसाधन त्यहीँ छोडेर फरार भएका छन्।
जिल्ला प्रहरी कार्यालय बाँकेका अनुसार बरामद मोटरसाइकलसहित कुखुराको अनुमानित मूल्य दुई लाख ३४ हजार ५ सय रुपैयाँ बराबरको रहेको छ। प्रहरीले नियन्त्रणमा लिएको कुखुरा, मोटरसाइकल र चालकविरुद्ध आवश्यक कानुनी कारबाही अघि बढाइएको जनाएको छ।
प्रहरीका अनुसार भारतबाट ल्याइने पशुजन्य वस्तु, विशेषगरी बोइलर कुखुरामा रोग संक्रमणको जोखिम उच्च हुने भएकाले बिना स्वीकृति आयात गर्नु पशु सेवा ऐन, २०४८ अनुसार गैरकानुनी हो। उक्त ऐनको धारा १७ अनुसार दोषी ठहरिएमा ३ महिना देखि ३ वर्षसम्मको कैद वा जरिवाना दुवै सजाय हुनसक्ने प्रावधान रहेको छ।
जनस्वास्थ्यसँग प्रत्यक्ष सम्बन्धित बोइलर कुखुराको अवैध ओसारपसारले आम नागरिकको स्वास्थ्यमा गम्भीर असर पुर्याउन सक्ने भएकाले प्रहरीले सचेत रहन आग्रह समेत गरेको छ। स्रोतका अनुसार भारतको बहराइच जिल्लाको सिपरा बजारमा सञ्चालन गरिएको कुखुरा फार्मका सञ्चालक पंकज धोबीले नेपाली तस्करसँग साठगाँठ गरी कुखुरा तस्करी गर्ने काम गर्दै आएका छन्। ती तस्करी गतिविधिमा नसरुद्दिन,भुरे,अकबर अलीको नामक व्यक्तिहरुको संलग्नता रहेको खुलेको छ।
स्थानीयवासीका अनुसार सशस्त्र प्रहरी बल नेपाल, बढैया बीओपी अन्तर्गतको पोस्ट नजिकै रहेको भारत–नेपाल सीमा क्षेत्र १० गजाको ३६ नम्बर पिलर आसपासबाट तस्करी हुने गरेको जनाइएको छ। एकजना शिपरीका व्यक्ति नाम नछाप्ने सर्तमा उनले भने सशस्त्र प्रहरी र तस्करहरूको सेटिङ रहेकोले दैनिक १५ देखि ३० क्विन्टल खुखुरा यही बाटोबाट ओसारपसार हुने गरेको उनले दाबी गरेका छन। कुखुरा व्यवसायी मञ्च बाँकेका सदस्य मुनिजर खानका अनुसार सुरक्षाकर्मीकै मिलोमतोमा कुखुराको तस्करी भइरहेको खानले बताउनुभयो
भारतबाट कुखुरा तस्करी भइरहेको सूचना पाए लगत्तै जिल्ला प्रहरी कार्यालय बाँकेका प्रमुख एसपी तुलबहादुर कार्कीले सीमा क्षेत्रमा रहेका प्रहरी चौकीहरूलाई तस्करी नियन्त्रण गर्न कडा निर्देशन दिएका छन्।
