बाँके, चैत ९ गते।
मुस्लिम समुदायको पवित्र महिना रमजानको अवसरमा नेपालगञ्ज उपमहानगरपालिका वडा नम्बर १७ परसपुरमा रहेको मुस्लिम युवाहरुको सक्रियतामा एक भव्य सामूहिक इफ्तार कार्यक्रम सम्पन्न भएको छ।
रमजानको एक्काइसौँ दिन आयोजित उक्त कार्यक्रममा करिब ५०० जना मुस्लिम धर्मावलम्बीहरूको सहभागिता रहेको थियो। सामूहिक इफ्तार कार्यक्रम मुस्लिम युवा समूह परसपुरद्वारा आयोजना गरिएको हो। कार्यक्रमको मुख्य आकर्षणका रुपमा मुस्लिम समुदायका अगुवा तथा हाजी समाजसेवी मुफ़्ती कैफूल वरा, कारी अजमत अलि साहब लगायतको उपस्थिति रहेको थियो।
कार्यक्रममा स्थानीय सुरक्षा निकायका प्रतिनिधि, स्थानीय जनप्रतिनिधि तथा समाजसेवीहरू समेतको उल्लेखनीय उपस्थिति रहेको थियो। सहभागिहरूले आपसी मेलमिलाप, धार्मिक सद्भाव र सामाजिक ऐक्यबद्धताको सन्देश दिएको बताइएको छ।
इफ्तार कार्यक्रम सहादत मस्जिद ईदगाह करवाला व्यवस्थापन समिति, परसपुरको समन्वयमा सम्पन्न भएको थियो। सो समितिका अध्यक्ष कौशर अलि सेखले कार्यक्रममा सामाजिक सद्भाव कायम रहोस् भन्ने उद्देश्यले आयोजना गरिएको जानकारी दिए।
सेखका अनुसार यस प्रकारका सामूहिक कार्यक्रमले मुस्लिम समुदायभित्र मात्र नभई अन्य समुदायसँग पनि आपसी समझदारी र सहकार्यलाई बढावा दिन सहयोग पुग्ने विश्वास लिएको बताए।
कार्यक्रममा सहभागी मुफ़्ती कैफूल वराले यस्ता धार्मिक कार्यक्रमहरू युवा पुस्ताद्वारा आयोजना हुनु सकारात्मक संकेत भएको बताए। उनले सामाजिक एकता, भाइचाराको भावना र धार्मिक सहिष्णुताको प्रवर्द्धनमा सामूहिक इफ्तार कार्यक्रमले महत्वपूर्ण भूमिका खेल्ने उल्लेख गरे।
कार्यक्रममा सहभागीहरूले सामूहिक रूपमा इफ्तार गरी रमजानको महत्त्वलाई अनुभूति गरे। रमजान महिनालाई आत्मसंयम, उपवास, प्रार्थना तथा दानपुण्यको विशेष समय मानिन्छ। मुस्लिम धर्मावलम्बीहरू सूर्योदयदेखि सूर्यास्तसम्म उपवास राख्ने यो महिनामा इफ्तार कार्यक्रम विशेष महत्वको मानिन्छ।
यस्ता कार्यक्रमले धार्मिक पर्वहरूलाई मात्र नभई समुदायबीचको सम्बन्धलाई प्रगाढ बनाउन सहयोग गर्ने विश्वास मुस्लिम युवाले व्यक्त गरेका छन्।
