बाँके, चैत ८ गते ।
बाँके जिल्लाको नेपालगञ्ज उपमहानगरपालिका वडा नम्बर ४ स्थित सुर्जी गाउँबाट लागू औषधसहित दुई जना युवकलाई प्रहरीले पक्राउ गरेको छ। पक्राउ पर्नेमा नेपालगञ्ज ४ का ३४ वर्षीय सन्तोष बिष्ट र सागर नाउँका एक युवक रहेका छन्।लागू औषध नियन्त्रण ब्युरो नेपालगञ्ज र जिल्ला प्रहरी कार्यालय बाँकेबाट खटिएको संयुक्त प्रहरी टोलीले उनीहरुलाई शङ्कास्पद अवस्थामा बाटोमा हिँडिरहेको देखेर जाँच गरेको थियो।
चेकजाँचको क्रममा नेपालगञ्ज उपमहानगरपालिका वडा नम्बर १८ बस्ने सन्तोष बिष्टको दायाँ हातमा रहेको कालो प्लास्टिकमा लुकाई छिपाई राखिएको ६ ग्राम ४२० मिलिग्राम खैरो धुलो पदार्थ फेला परेको प्रहरीले जनाएको छ। उक्त पदार्थ लागू औषध ब्राउन सुगर जस्तो देखिने खैरो धुलो रहेको बताइएको छ।
त्यसैगरी, नेपालगञ्ज उपमहानगरपालिका वडा नम्बर ४ बस्ने सागर नाउँको ट्रयाकसुटको गोजीभित्र लुकाई राखिएको ६ ग्राम २७० मिलिग्राम लागू औषधसमेत बरामद गरिएको छ। प्रहरीले दुबैको साथबाट कुल १२ ग्राम ६९० मिलिग्राम लागू औषध बरामद गरेको जनाएको छ। प्रारम्भिक जाँचमा उक्त पदार्थ खैरो हिरोइन (ब्राउन सुगर) भएको अनुमान गरिएको छ,।
प्रहरीले दुवै जनालाई लागू औषध सम्बन्धी कसूरमा नियन्त्रणमा लिएर अनुसन्धान अगाडि बढाइएको जनाएको छ। जिल्ला प्रहरी कार्यालय बाँकेका सूचना अधिकारी तथा प्रवक्ता प्रहरी निरीक्षक यामबहादुर मलका अनुसार, पक्राउ परेकाहरुविरुद्ध लागू औषध सम्बन्धी मुद्दामा कारबाही प्रक्रिया अघि बढाइएको छ।
पक्राउ परेका दुबै अभियुक्तलाई आवश्यक कानुनी प्रक्रिया पूरा गरी बाँके जिल्ला अदालतमा पेश गरिने प्रहरीको भनाइ छ।
