नेपालगञ्ज, चैत ८ गते ।
नेपालगञ्ज उपमहानगरपालिका वडा नम्बर २३ मा पर्ने हजरत सामुदायिक वन उपभोक्ता समूहको वार्षिक साधारण सभा भव्य रूपमा सम्पन्न भएको छ। “हरियो वन, नेपालको धन” भन्ने मूल नाराका साथ सम्पन्न भएको उक्त सभामा मारूपसेकको अध्यक्षतामा ५२९ जना साधारण सदस्यहरूको उल्लेखनीय उपस्थिति रहेको थियो।
सभामा समूहका सचिव अर्जुन सिंह चौहानले प्रस्तुत गरेको प्रतिवेदन अनुसार वन संरक्षण, व्यवस्थापन, पारदर्शिता, तथा समुन्नत भविष्य निर्माणका लागि विभिन्न महत्वपूर्ण निर्णयहरू गरिएका छन्। उपभोक्ताहरूको सक्रिय सहभागिता र सरोकारवालाहरूको सुझावमा आधारित रहेर भविष्यका लागि कार्ययोजना समेत तय गरिएको छ।
कार्यक्रममा सब डिभिजन वन कार्यालय रांझाका अधिकृत राजबहादुर चौधरी, सामुदायिक वन संघका प्रतिनिधि, पूर्व वन समूह अध्यक्षहरू, स्थानीय जनप्रतिनिधि तथा अन्य सरोकारवाला व्यक्तिहरूको उपस्थिति रहेको थियो। सभामा वन संरक्षण, वन्यजन्तु सुरक्षा, वातावरणीय सन्तुलन, विपद् व्यवस्थापन, सामुदायिक विकास, समूहको आर्थिक पारदर्शिता लगायतका विषयहरूमा गम्भीर छलफल गरिएको थियो।
सचिव चौहानले जानकारी दिएअनुसार सभाले समूहको आगामी कार्यकालका लागि प्राथमिकताका क्षेत्रहरू निर्धारण गर्नुका साथै सदस्यहरूबाट आएका सुझाव र गुनासोहरूलाई सम्बोधन गरेको छ। वन क्षेत्रमा अवैध कटानी नियन्त्रण, घाँसदाउरा व्यवस्थापन, सामुदायिक भवन निर्माण, र सिँचाइ योजनाहरूमा ध्यान दिने निर्णय गरिनुका साथै महिलाहरूको सक्रिय सहभागिता सुनिश्चित गर्ने योजना पनि अघि सारिएको छ।
वक्ताहरूले सामुदायिक वनको दीगो विकासका लागि सबै सदस्यहरू एकजुट भएर काम गर्नुपर्नेमा जोड दिएका थिए। साथै, वन संरक्षणसँगै समुदायको आर्थिक, सामाजिक तथा वातावरणीय समृद्धिका लागि समूहले चालु आर्थिक वर्षमा सञ्चालन गरेका विभिन्न कार्यक्रमहरूको समीक्षा पनि गरिएको थियो।
हजरत सामुदायिक वन उपभोक्ता समूहले विगत केही वर्षदेखि वन संरक्षण, वातावरणीय सन्तुलन, विपद् व्यवस्थापन र समुदाय सशक्तिकरणमा उल्लेखनीय योगदान पुर्याउँदै आएको छ। सभाको निष्कर्षअनुसार समुदायमा वनप्रतिको चेतना झनै बढेको छ र भविष्यमा अझ सशक्त रूपमा अगाडि बढ्ने प्रतिबद्धता व्यक्त गरिएको छ।
