नेपालगञ्ज, चैत ६ गते ।
मुस्लिम धर्मावलम्बीहरूको पवित्र पर्व रमजानको १८औं दिनको अवसरमा नेपालगञ्ज मेडिकल कलेजमा विशेष इफ्तार कार्यक्रमको आयोजना गरिएको छ। सो कार्यक्रम डा. रोमन किदवाई र डा. आसिम किदवाईको संयोजनमा सम्पन्न भएको हो।
रमजान इस्लाम धर्मावलम्बीहरूका लागि आत्मशुद्धि, संयम र इबादतको महिना हो। यस अवसरमा दैनिक सूर्यास्तपछिको समय इफ्तारको रुपमा मनाइन्छ, जसमा उपवास (रोजा) राख्नेहरूले फलफूल, पानी, खजुर लगायतका खानेकुरा सेवन गरी उपवास तोड्ने गर्छन्। यस्तै धार्मिक तथा सामाजिक भावना प्रवर्द्धन गर्ने उद्देश्यले डा. किदवाईले नेपालगञ्ज मेडिकल कलेजमै इफ्तार कार्यक्रमको आयोजना गरेका हुन्।
उक्त कार्यक्रममा नेपालगञ्जका विभिन्न क्षेत्रका मुस्लिम समुदायका अगुवा, युवा समाजसेवीहरू तथा प्रतिष्ठित व्यक्तित्वहरूको उपस्थिति रहेको थियो। कार्यक्रममा फैजुन नबी जामा मस्जिद ईदगाह सञ्चालक समितिका पूर्व सदस्यहरू तथा पूर्व महासचिव इरफान सिद्दिकी समेत सहभागी हुनु भएको थियो।
इफ्तार कार्यक्रमलाई सम्बोधन गर्दै पूर्व महासचिव सिद्दिकीले यस्तो प्रकारको इफ्तार कार्यक्रमले समाजमा आपसी सद्भाव, एकता र धार्मिक सहिष्णुताको सन्देश दिने पूर्व महासचिव सिद्दिकीले लिमरा खबरलाई बताए।
इफ्तार कार्यक्रममा सहभागीहरूलाई फलफूल, खजुर, जुस, बिर्यानी लगायतका परिकारहरू प्रदान गरिएको थियो। कार्यक्रम संयोजक डा. रोमन किदवाईले रमजानको महिना परोपकार र सेवा भाव प्रकट गर्ने समय भएकाले आफूहरूले समाजका अगुवाहरूसँग मिलेर इफ्तार कार्यक्रम आयोजना गरेको जानकारी दिए।
