नेपालगन्ज चैत २ गते ।
मदरसा दारुल उलुम फैजुन्नबी जामा मस्जिद इदगाह सञ्चालक समितिका पूर्व महासचिव इरफान सिद्दिकीले फागुन २९ गते अनलाइन सञ्चारमाध्यममा प्रकाशित समाचारप्रति कडा आपत्ति जनाउँदै त्यसलाई पूर्ण रूपमा भ्रामक र आधारहीन भएको बताएका छन्। सामाजिक सञ्जालमार्फत आफ्नो धारणा सार्वजनिक गर्दै उनले समाचारमा कुनै सत्यता नरहेको र पत्रकारिताको मूल धर्मविपरीत रहेको बताएका छन्।
समाचारमा उल्लेख गरिएअनुसार जामा मस्जिदले विगत आठ वर्षदेखि लेखा परीक्षण नगरेको र कर चुक्ता नभएको दाबी गरिएको थियो। तर, पूर्व महासचिव सिद्दिकीले संस्थाले २०७८ सालसम्म लेखा परीक्षण गरिसकेको र कर चुक्ता प्रमाणपत्र समेत प्राप्त गरिसकेको स्पष्ट पारे।
सिद्दिकीले अनलाइन समाचारले आठ वर्षदेखि लेखा परीक्षण नभएको दाबी गरे पनि तथ्य त्यसको ठीक उल्टो रहेको बताए। “यदि २०७३ सालदेखि लेखा परीक्षण नभएको भए २०८१ सालमा आठ वर्ष पुग्थ्यो, तर वास्तविकता के छ भने संस्थाले २०७८ सालसम्म लेखा परीक्षण गरिसकेको छ,” उनले भने। उनले अनलाइन समाचारमा प्रस्तुत गरिएका तथ्यहरू भ्रामक र उद्देश्यप्रेरित रहेको आरोप लगाए।
उनका अनुसार, आठ वर्षको लेखा परीक्षण नभएको कुरा उठाएर २०८६ सालसम्मको लेखा परीक्षणको माग गर्नु भनेको भविष्यको कुरा गरेर झुटो प्रचार गर्नु हो। यसरी अनावश्यक रूपमा विवाद सिर्जना गर्नु गलत भएको उनको भनाइ छ।
सिद्दिकीले प्रकाशित समाचारमा कुनै आधिकारिक स्रोत उल्लेख नगरी गम्भीर आरोप लगाइएकोमा कडा आपत्ति जनाएका छन्। “पैसा हिनामिना भयो, सटरको करोडौं हडपियो, भौतिक सम्पत्तिमा अनियमितता गरियो भन्ने आरोप प्रमाणबिना लगाउनु पत्रकारिताको नैतिकताविपरीत हो,” उनले भने।
यदि सञ्चारमाध्यमले आफ्नो समाचारलाई सही ठान्छ भने प्रमाणसहित तथ्य सार्वजनिक गर्नुपर्ने उनको माग छ। “अनलाइन मिडियाले प्रमाणबिना समाचार प्रकाशित गर्नु गलत हो। यदि कुनै आर्थिक हिनामिना भएको ठोस प्रमाण छ भने त्यसलाई सार्वजनिक गरियोस्,” उनले भने।
सिद्दिकीले पत्रकारिताको नैतिकता र जिम्मेवारीको विषय उठाउँदै भने, “यदि कसैले अन्याय महसुस गरिरहेको छ भने पत्रकारिताले न्याय दिन सक्दैन, त्यसका लागि अदालतको ढोका खुला छ।”
समाचारमा सहायक प्रमुख जिल्ला अधिकारीको संयोजकत्वमा छानबिन समिति गठन गरिएको उल्लेख गरिएको छ। तर, सिद्दिकीले यस्तो समितिले कानुनी रूपमा छानबिन गर्न नसक्ने स्पष्ट पारेका छन्। “छानबिन समिति भनेको कानुनी प्रक्रिया अनुसार गठन हुनुपर्ने निकाय हो। कुनै पद गुमाएका व्यक्तिहरूको व्यक्तिगत आक्रोशलाई समाचारको रूपमा प्रकाशन गर्नु दुःखद छ,” उनले भने।
पूर्व महासचिव सिद्दिकीले आफ्नो कार्यकालमा जामा मस्जिदका लागि विभिन्न महत्वपूर्ण विकास कार्यहरू सम्पन्न गरिएको दाबी गरे। उनका अनुसार,जामा मस्जिदको पूर्ण रूपमा नयाँ टाइल्ससहितर्निर्माण,मदरसा भवनलाई नयाँ रूपमा पुनर्निर्माण गरी सबै सटरहरू सुधार,बीपी चौकमा रहेको काँद्री मस्जिदलाई आधुनिक बनाउँदै एसी जडान .जामा मस्जिदमा आधुनिक गुसलखाना (अजुखाना) र ट्वाइलेट निर्माण.वर्षौंदेखि बक्यौता रहेको विद्युत् बिल चुक्ता ,मस्जिदभित्र दुईवटा उच्च क्षमताका जेनेरेटर खरिद,ईगाहको ऐतिहासिक गेट निर्माणाधीन अवस्थामा.न्युरोडको जग्गामा थप ३० वटा नयाँ सटर निर्माण,मस्जिदभित्र रहेको मदरसाको पढाइ निरन्तर सञ्चालन गरिएको छ।
सिद्दिकीले सञ्चारमाध्यमहरूलाई सत्यतथ्य पुष्टि गरेर मात्र समाचार सम्प्रेषण गर्न आग्रह गरेका छन्। “अनलाइन पत्रकारिता द्रुत गतिमा अगाडि बढेको छ। तर, यसले समाजमा झूटा समाचार फैलाउने होइन, सत्यतथ्य बाहिर ल्याउने काम गर्नुपर्छ,” उनले भने।
उनले थपे, “तथ्य प्रमाणसहित समाचार लेख्न जरुरी छ। यदि कुनै समाचार प्रमाणसहित सत्य सावित हुन्छ भने त्यसको सम्मान गरिन्छ। तर, मनगढन्ते समाचार प्रकाशन गर्नु न्यायसंगत होइन।”
इरफान सिद्दिकीले जामा मस्जिद सम्बन्धी प्रकाशित समाचारलाई गलत, भ्रामक र उद्देश्यप्रेरित भन्दै आफ्नो व्यक्तिगत सामाजिक सञ्जाल फेसबुक मार्फत समेत खण्डन गरेका हुन। उनले पत्रकारिता व्यवसायलाई निष्पक्ष, तथ्यमा आधारित र उत्तरदायी बन्न आग्रह गरेका छन्।
