बाँके माघ २९ गते ।
नेपालगन्ज उपमहानगरपालिका वडा नम्बर ५ ले वडा स्तरीय टेनिस क्रिकेट प्रतियोगिता आयोजना गर्ने भएको छ। प्रतियोगिताको सम्पूर्ण तयारी पूरा भइसकेको वडा अध्यक्ष सराफत हुसेन शेषले जानकारी दिएका छन्। प्रतियोगिता फागुन १ गतेदेखि सुरु भई फागुन १५ गतेसम्म सञ्चालन हुनेछ।
प्रतियोगिताको विजेता टिमले नगद रु १ लाख पुरस्कार प्राप्त गर्नेछ भने उपविजेता टिमले रु ५० हजार पाउनेछ। यसैगरी, प्रतियोगितामा उत्कृष्ठ प्रदर्शन गर्ने खेलाडीहरूलाई विभिन्न उपहार प्रदान गरिनेछ। म्यान अफ द सिरिजले एक थान एलईडी टिभी प्राप्त गर्नेछ, जबकि वेष्ट बलरले एक थान दराज र वेष्ट ब्याट्सम्यानले एक थान साइकल पुरस्कारस्वरूप पाउनेछन्। वडा अध्यक्ष शेषका अनुसार प्रतियोगितालाई भव्य र सफल बनाउन आवश्यक सबै तयारी पूरा भइसकेको छ।
मंगलबार आयोजित पत्रकार सम्मेलनमा बोल्दै वडा अध्यक्ष शेषले खेलकुदको महत्वमाथि प्रकाश पारे। उनले खेलकुद केवल मनोरञ्जनको साधन मात्र नभई शारीरिक स्वास्थ्यका लागि आवश्यक रहेको बताए। खेलकुदको माध्यमबाट युवाहरूलाई अनुशासित, स्वस्थ र ऊर्जावान बनाउन सकिन्छ। साथै, खेलाडीहरूको सीप र प्रतिभा उजागर गर्न यस्ता प्रतियोगिताहरू आयोजना गर्नु आवश्यक रहेको उनले बताए।
उनले नेपालगन्जमा एउटा सुविधासम्पन्न स्टेडियम आवश्यक रहेको औंल्याए। हाल नेपालगन्जका खेलाडीहरू उचित खेलमैदान अभावका कारण आफ्नो उत्कृष्ट क्षमता देखाउन असमर्थ भइरहेका छन्। गुणस्तरीय खेल मैदान, खेल सामग्री तथा खेलाडीहरूलाई आवश्यक पूर्वाधारको व्यवस्था गर्न स्थानीय तथा प्रदेश सरकारसँग पहल गरिनुपर्ने उनको भनाइ छ।
नेपालगन्जमा क्रिकेटप्रति युवाहरूको बढ्दो रुचिलाई ध्यानमा राखी यस्ता प्रतियोगिताहरू नियमित रूपमा आयोजना गर्नुपर्नेमा उनले जोड दिए। वडा अध्यक्ष शेषले यस्ता खेलकुद प्रतियोगिताहरूले युवालाई मद्दत गर्ने बताए। साथै, स्थानीय खेलाडीहरूलाई प्रेरित गर्दै उनीहरूलाई राष्ट्रिय तथा अन्तर्राष्ट्रिय स्तरमा अघि बढ्ने अवसर प्रदान गर्नुपर्ने आवश्यकता रहेको उल्लेख गरे।
यस प्रतियोगिताले नेपालगन्जका क्रिकेट खेलाडीहरूलाई आफ्नो प्रतिभा देखाउने राम्रो अवसर प्रदान गर्ने विश्वास व्यक्त गरिएको छ। आयोजक समितिले प्रतियोगितालाई व्यवस्थित, न्यायपूर्ण र प्रतिस्पर्धात्मक बनाउनका लागि आवश्यक सबै तयारी पूरा गरिसकेको छ। खेलप्रेमीहरूका लागि यो प्रतियोगिता रमाइलो मात्र नभई नेपालगन्जको खेलकुद क्षेत्रलाई अघि बढाउने महत्वपूर्ण अवसर बन्ने अपेक्षा गरिएको छ।
