बाँके माघ ८ गते ।
नेपालगञ्ज उपमहानगरपालिका वडा नंबर २१ बिर्तागाउँका २२ वर्षीय अरबी खाँको हत्या प्रकरणमा न्यायको माग गर्दै उनका परिवार र आफन्तले मङ्गलबार नेपालगञ्जको धम्वोजी चोकमा प्रदर्शन गरेका छन्। गत चैत १८ गते विभत्स तरिकाले हत्या गरिएका खाँको परिवारले ११ महिना बितिसक्दा पनि अपराधीहरूलाई पक्राउ नगरेको भन्दै विरोधस्वरूप आन्दोलन थालेका हुन्।
धम्वोजी चोकमा प्रदर्शनकारीहरूले टायर बालेर चर्को नाराबाजी गरेका थिए। ‘हत्यारालाई कारबाही गर’, ‘प्रहरी प्रशासन होशियार’ जस्ता नारा लगाउँदै उनीहरूले जिल्ला प्रहरी कार्यालय बाँकेको विरोध गरेका छन्। प्रदर्शनकारीहरूले किटानी जाहेरी दिएर पनि प्रहरीले अपराधीहरूलाई उन्मुक्ति दिन खोजेको आरोप लगाएका छन्।
मृतकका आमा रबिया खाँले प्रहरी र हत्याराबीच मिलेमतो रहेको दाबी गर्दै आक्रोश व्यक्त गरिन्। उनले भनिन्, “प्रहरीले हत्याराबाट पैसा खाएर उनीहरूलाई जोगाउने प्रयास गरिरहेको छ। हाम्रो छोराको हत्या भएको यत्रो समय बितिसक्दा पनि अपराधीहरू खुलेआम हिँडिरहेका छन्। हामीलाई सडकमा आउन बाध्य पार्ने पीडाको कुरा त प्रहरी प्रशासनले कहिले बुझ्ने?”
पीडित परिवारले प्रहरी प्रशासनको लापरबाहीले हत्यामा संलग्न व्यक्तिहरू अझैसम्म पक्राउ पर्न नसकेको आरोप लगाएका छन्। उनीहरूको भनाइमा, प्रहरीको गैरजिम्मेवारीका कारण हत्यारा अहिलेसम्म कानुनको दायराभन्दा बाहिर छन्।
प्रदर्शनमा सहभागी गाउँलेहरूले हत्या प्रकरणमा शीघ्र न्यायको माग गर्दै आन्दोलनलाई थप कडा बनाउने चेतावनी दिएका छन्। उनीहरूले अपराधीहरूलाई चाँडो गिरफ्तार नगरिए आन्दोलनको स्वरूप परिवर्तन गरिने र प्रशासनलाई थप दबाब दिने बताएका छन्।
हत्या प्रकरणले अहिले सामाजिक सञ्जालमा पनि व्यापक चर्चा पाएको छ। स्थानीयस्तरमा जनआक्रोश बढ्दै गएको यो मुद्दाले सरकार र प्रहरी प्रशासनप्रतिको विश्वासलाई खस्काइरहेको छ।
हत्या प्रकरणको छानबिन र दोषीमाथि कानुनी कारबाही सुनिश्चित गर्न प्रदर्शनकारीहरूले निरन्तर आन्दोलन जारी राख्ने बताएका छन्। पीडित परिवार र गाउँलेहरूले न्यायको खोजीमा आफ्नो संघर्षलाई अझ बलियो बनाउने अठोट गरेका छन्।
