जानकी पुष १० गते ।
बाँके जिल्लाको जानकी गाउँपालिका वडा नम्बर १ स्थित पचपोखरा गाउँका बासिन्दा नेपाल प्रहरीले बारम्बार छापा मारेपछि आक्रोशित भएका छन्। जिल्ला प्रहरी कार्यालय बाँकेका एसपी तुलबहादुर कार्कीको निर्देशनमा स्थानीय प्रहरी चौकीको टोलीले हिजो राति सोही गाउँका सञ्जय लोधको घरमा छापा मारेको थियो। तर, कुनै अवैध सामग्री फेला नपरेको घरधनी लोधले बताएका छन्।
घरधनी सञ्जय लोधका अनुसार, यसअघि पनि प्रहरीले उनकै घरमा छापा मारेको थियो। तर, अहिलेसम्म कुनै अवैध वस्तु भेटिएको छैन। बारम्बार घरमा छापा मारे पनि कुनै प्रमाण नफेला परेको घटनाले लोध परिवार र गाउँलेहरूमा प्रहरीप्रति असन्तोष र आक्रोशको भावनालाई बढाएको छ। लोधले भने, “हाम्रो परिवार कुनै गैरकानुनी गतिविधिमा संलग्न छैन। बारम्बारको छापामारीले हाम्रो मानसिक र सामाजिक जीवनमा नकारात्मक प्रभाव पारेको छ। अब प्रहरीले बिना कारण यसरी छापा मार्न पाउँदैन।”
प्रहरीको तर्फबाट प्रतिक्रिया माग्दा, स्थानीय प्रहरी चौकीले आफूहरूले केही सूचनाका आधारमा छानबिनका लागि छापा मारेको स्पष्ट पारेको छ। “हामी एसपीको निर्देशनअनुसार छानबिन गरिरहेका छौँ र कसैको अधिकार हनन नगर्ने प्रयास गरिरहेका छौँ,” प्रहरीले भन्यो।
तर, स्थानीयवासीहरूले भने सूचना दिने व्यक्तिको नियतप्रति शंका व्यक्त गरेका छन्। उनीहरूले प्रहरीलाई यस्ता सूचनादाताको अनुसन्धान गर्न आग्रह गर्दै भनेका छन्, “कसैलाई बेइज्जत गर्ने उद्देश्यले झुटा सूचना दिने व्यक्तिहरूको पहिचान गरिनुपर्छ। यस्तो कार्यले समाजमा अस्थिरता र अविश्वासको वातावरण सिर्जना गर्दछ।”
स्थानीय बासिन्दाहरूले यस घटनाले आफ्नो समुदायमा त्रास फैलाएको र अधिकारमाथि हस्तक्षेप भएको गुनासो गरेका छन्। उनीहरूले प्रहरी प्रशासनलाई चाँडै सत्यतथ्य सार्वजनिक गर्न माग गरेका छन्।
यसैबीच, गाउँलेहरूले प्रहरीले बिना प्रमाण बारम्बार छापा मार्ने काम बन्द गर्नुपर्ने र दोषीमाथि कानुनी कारबाही गर्नुपर्ने माग गरेका छन्। “यस्ता घटनाले हाम्रो गाउँको शान्ति भंग गरेको छ। प्रहरी प्रशासनले अब यस्ता घटनालाई गम्भीरतापूर्वक लिएर निष्पक्ष छानबिन गर्नुपर्छ,” एक स्थानीयले भने।
जानकी गाउँपालिका वडा नम्बर १ का वडा अध्यक्ष मोहम्मद राजा राईका अनुसार, प्रहरीको बारम्बारको छापामारीले स्थानीय सञ्जय लोधमाथि ज्यादती भइरहेको छ। राईले भने, “प्रहरीले बिना प्रमाण बारम्बार छापा मारेर स्थानीयको मानसिक र सामाजिक जीवनमा असर पुर्याइरहेको छ। यस प्रकारको गतिविधि तत्काल रोकिनुपर्छ।”
वडा अध्यक्ष राईले प्रहरी प्रशासनलाई कुनै पनि कारबाही अघि प्रमाणको आधारमा काम गर्न सुझाव दिएका छन्। उनले स्थानीयवासीको गुनासोलाई गम्भीरतापूर्वक लिन र सत्यतथ्य सार्वजनिक गर्न माग गरेका छन्।
प्रहरी प्रशासनले यो विषयमा चाँडै ठोस निर्णय लिनुपर्ने र भविष्यमा यस्ता विवादबाट बच्न उचित कदम चाल्नुपर्नेमा स्थानीयको जोड रहेको छ।
