बर्दिया असोज २८ गते ।
भारतीय वन रक्षकले प्रहार गरेको गोली लागेर चार नेपाली घाइते भएका छन,। घटना आइतबार साँझ भएको हो, यो घटना बर्दिया जिल्लाको गुलरिया नगरपालिका–८ अन्तर्गत पर्ने दशगजा क्षेत्र नजिकैको चौगुर्जी मौजा नजिक भएको बताइएको छ। स्थानीयहरूले जनाए अनुसार भारतीय पक्षका वन रक्षकले अन्धाधुन्ध गोली चलाउँदा चार नेपाली नागरिकलाई गोलीको छर्रा लागेको छ।
घटनामा गम्भीर घाइते भएका बलराम लोधलाई थप उपचारको लागि कोहलपुरस्थित शिक्षण अस्पतालमा लगिएको छ। उनका साथै अन्य घाइतेहरूमा राजेन्द्र पासी, रामा लोध र स्थानीय भाषामा गोलुवा भनेर चिनिने व्यक्तिलाई पनि गोली लागेको छ। घाइतेहरूको शरीरका विभिन्न भागमा छर्रा लागेको छ। प्रहरीका अनुसार बलराम लोधको ढाडमा गोलीको छर्रा लागेको छ र उनको अवस्था गम्भीर रहेको छ। बाँकी घाइतेहरूको अवस्था सामान्य रहेको बताइएको छ।
यस घटनाको बारेमा थप अनुसन्धान भइरहेको छ। प्रारम्भिक बयान अनुसार घाइते बलराम लोधले भारतीय वनकर्मीले गोली चलाएको बताएका छन्। घटनास्थल नेपाल–भारत सीमा क्षेत्रमा पर्ने ८२ दशमलव ५ किलोमिटर खुला सीमाको ६२ र ६३ नम्बरको पिल्लर नजिक रहेको छ। स्थानीयहरूका अनुसार भारतीय वन रक्षकले सीमावर्ती क्षेत्रमा अन्धाधुन्ध गोली प्रहार गरेका थिए।
घटनापछि बर्दिया जिल्ला प्रशासन कार्यालयले छानबिन समिति गठन गरेको छ। समितिले घटनाको पूर्ण छानबिन गरी दोषीमाथि कारबाहीको सिफारिस गर्ने बताइएको छ। यो क्षेत्र नेपाल–भारत सीमामा पर्ने जंगल र वन्यजन्तु संरक्षण क्षेत्र हो, जसकारण यहाँ दुवै देशका वन रक्षकहरूको उपस्थिति हुन्छ। यद्यपि, यसअघि पनि भारतीय वनकर्मीबाट यस्ता घटनाहरू भएका थिए। असार १ गते पनि भारतीय वनकर्मीले एक नेपाली नागरिकलाई नियन्त्रणमा लिई दुई दिनसम्म बेपत्ता बनाएका थिए। ती व्यक्ति पछि खुट्टा भाँचिएको अवस्थामा फेला परेका थिए।
सीमावर्ती क्षेत्रमा यस्तो प्रकारका घटनाहरूले स्थानीय जनतामा त्रास र असुरक्षाको भावना फैलाएको छ। नेपाल–भारत सीमाका यी क्षेत्रहरूमा यस्ता घटनाहरू पटक–पटक हुनुले दुई देशबीचको कूटनीतिक सम्बन्धमा असर पर्ने चिन्ता पनि स्थानीयहरूले व्यक्त गरेका छन्। घटना सम्बन्धमा नेपाल सरकारले कूटनीतिक तवरमा भारत सरकारसँग संवाद गर्ने आवश्यक देखिएको छ।
