जानकी फागुन ७ गते।
सशस्त्र प्रहरी बल बढैया बीओपीले आज शिपरी नजिकै किरननालापुलबाट प्रतिवन्धित भारतीय ब्रोइलर कुखुरा बरामद गरी नष्ट गरेको छ । सशस्त्र प्रहरी बल नेपालको प्रस्तावित सीमा सुरक्षा बढैया बीओपीबाट सशस्त्र प्रहरी निरीक्षक टिका राम गोसाईको कमाण्डमा खटिएको सशस्त्र प्रहरीको गस्ती टोलीले जानकी गाउँपालिका वडा नम्बर १ स्थित शिपरी क्षेत्रबाट प्रतिवन्धित भारतीय ब्रोइलर कुखुरा बरामद गरेको हो ।
सशस्त्र प्रहरीले १५:०० बजेको समयमा भारतबाट नेपालतर्फ चार वटा नेपाली नम्बर मोटरसाइकलमा राखेर ल्याउदै गरेको अवस्थामा करीव ४८ हजार मूल्य बराबरको कुखुरा बरामद गरी नष्ट पारेको हो ।सशस्त्र प्रहरीले प्रतिवन्धित भारतीय कुखुरा ओसार्न प्रयोग गरिएको चार वटा नेपाली नम्वरको मोटरसाइकल समेत बरामद गरेको छ ।
त्यसका चालक भने सशस्त्र प्रहरीलाई देख्नासाथ फरार भएका छन् । बरामद गरिएको कुखुरा सशस्त्र प्रहरी बल बढैया बीओपीको कम्पाउन्ड भित्र ल्याएर खाल्डो खनेर स्थानीय जनप्रतिनिधी, प्रहरी र पत्रकारको रोहबरमा नष्ट गरिएको सशस्त्र प्रहरी निरीक्षक गोसाईले जानकारी दिनुभयो । बरामद गरिएको मोटर साइकल नेपालगंज भंसार कार्यालयमा पठाइएको छ।
