नेपालगञ्ज,वैशाख,२९,गते ।
नरैनापुर गाउँपालिकाबाट नेपालगञ्जतर्फ लैजाँदै गरेको २६ थान अवैध सालको काठ सशस्त्र प्रहरीले बरामद गरेको छ । नरैनापुर गाउँपालिका वडा नंबर ४ बाट नेपालगन्जतर्फ आउँदै गरेको भे.१ त ६८०६ नम्बरको ट्रयाक्टरको ट्रालीभित्र लुकाएर ल्याउँदै गर्दा २६ थान सालको चिरान (फ्रेम) सहित काठ बोकेको ट्रयाक्टर, ट्राली सशस्त्र प्रहरी बल गंगापुरले नियन्त्रणमा लिएको हो ।
विशेष सूचनाको आधारमा खानतलासी गर्दा नरैनापुर– ४ बस्ने छोट्टन खाँको गहुँ लोड गरिएको ट्याक्टरको ट्रालीभित्र लुकाएर नेपालगन्जतर्फ ल्याउने क्रममा नरैनापुर गाउँपालिका वडा नंबर ६ जमुनीबाट अवैध काठ र गहुँ बरामद भएको सशस्त्र प्रहरी बल ३० नम्बर गण बागेश्वरी बाँकेका सशस्त्र प्रहरी प्रवक्ता डिएसपी लक्ष्मण थापाले बताए ।
अवैध काठ ओसारपसार भइरहेको भन्ने सूचनाको आधारमा खानतलासी गर्ने कर्ममा काठ बरामद भएको थापाले बताए । बरामद भएको काठ र ट्रयाक्टरलाई आवश्यक कारबाहीका लागि वन कार्यालय बाँकेमा बुझाइएको उनले जानकारी दिए। ट्रयाक्टरको ट्राली मा लोड रहेको गहुँ नेपालगन्ज भन्सार कार्यालयमा बुझाउने डिएसपी थापाले जानकारी गराए।
