बांके- पुष १८ गते-नेपालगन्जमा आइतबार गणेशपुरमा खुकरी प्रहार गरी फरार भएका चार जनालाई प्रहरीले पक्राउ गरेको छ। आइतबार दिउँसो २ बजेतिर नेपालगन्ज उपमहानगरपालिका–४ गणेशपुरस्थित यूपी ३२ इयू ८६१६ नम्बरको भारतीय कारबाट आएका चार जनाले वडा नम्बर १२ का अनुराग शाह, जानकी गाउँपालिका–३ का उज्वल शाह र नेपालगन्ज–४ का सुभम जंग शाहलाई खुकुरी प्रहार गरी फरार भएका थिए।
पक्राउ पर्नेमा विनय भण्डारी, नारायण डाँगी, प्रकाश रासाइली र तासे भन्ने प्रकाश थापा रहेका छन् । खुकुरी प्रहार गरी फरार भएको भन्ने सूचनापछि तत्काल जिल्ला प्रहरी कार्यालय बाँकेबाट प्रहरी उपरीक्षक सन्तोष सिंह राठौरको नेतृत्वमा खटिएको टोलीले घाइतेहरुलाई उपचारका लागि नेपालगन्ज मेडिकल कलेजमा पुर्याएको थियो ।
खुकुरी प्रहार गरी फरार भएकाहरुलाई पछ्याउने क्रममा उनीहरुले प्रयोग गरेको गाडी बाँकेको डुढुवा गाउँपालिका–३ स्थित बनकट्टीबाट रामपुरुवा जाने बाटो दक्षिणतर्फ खेतमा फेला परेको थियो । प्रहरीले सोही गाडीमा रहेका नेपालगन्ज उपममहानगरपालिका–१८ बस्ने २९ वर्षीय विनय भण्डारी, वडा नम्बर ६ का ३१ वर्षीय प्रकाश थापा, राप्ती सोनारी गाउँपालिका–२ का ३१ वर्षीय नारायण डाँगी र वैजनाथ गाउँपालिका–५ का २९ वर्षीय प्रकाश रसाइली भन्ने तुल्सीराम सुनारलाई नियन्त्रणमा लिएको हो।
उनीहरुले प्रहार गरेको दुई थान कुखुरी नेपालगन्ज उपमहानगरपालिका–५ फुल्टेक्राबाट बरामद गरी अनुसन्धान भइरहेको प्रहरीले जनाएको छ।
