काठमाडौँ — जनता समाजवादी पार्टी (जसपा) को विवाद टुंग्याउन निर्वाचन आयोगले कार्यकारिणी समिति सदस्यलाई बोलाएको छ ।
प्रमुख निर्वाचन आयुक्त दिनेशकुमार थपलियाको अध्यक्षतामा बिहीबार बसेको इजलासले जसपा विवाद टुंग्याउन कार्यकारिणी सदस्यहरुलाई सनाखतका लागि साउन ११ गते बिहान ११ बजे आयोगमा बोलाउने निर्णय गरेको हो ।
पार्टी एकीकरण हुँदाका बखतका केन्द्रीय कार्यकारिणी समितिका सदस्यहरूलाई परिचय खुल्ने नागरिकता वा मतदाता परिचयपत्रसहित साउन ११ गते उपस्थित हुन भनेर पत्र पठाउने निर्णय भएको छ ।
पार्टी एकीकरण बेला जसपाको ५१ जनाको कार्यकारिणी समिति रहेको कागजात आयोगमा बुझाइएको छ । जसमध्ये ३२ भन्दाबढी आफ्नो पक्षमा रहेको अध्यक्ष उपेन्द्र यादवको सचिवालयले बताएको छ ।
पार्टीमा विवाद भएपछि अध्यक्ष महन्थ ठाकुरले उपेन्द्र यादवसहित उनका पक्षका केन्द्रीय कार्यकारिणी सदस्यलाई हटाएर आफू निकट नेताहरुलाई मनोनयन गरेका थिए । त्यसको विवरण अद्यावधिक गर्न निर्वाचन आयोगमा पठाए पनि आयोगले अस्वीकार गरेको थियो । त्यसपछि अध्यक्ष यादवले आधिकारिता माग गर्दै बहुमत केन्द्रीय कार्यकारिणीको हस्ताक्षर आयोगमा बुझाएका थिए ।
पछिल्लो समय दुवै पक्षले पार्टी विभाजन गरिदिन भन्दै आयोगमा निवेदन दिएका थिए । सोही विवाद टुंगो लगाउन बिहीबार पनि इजलास बसेको हो ।
सनाखतपश्चात् आयोगले राजनीतिक दलसम्बन्धी ऐनको दफा ४४(६) बमोजिम सोही दिन बहुमत पक्षलाई आधिकारिकता दिने छ ।
