७ साउन, काठमाडौं । नहरको पानिमा डुबेर बाँके र चितवनमा पाँच जनाको मृत्यु भएको छ । पानिमा डुबेर बाँकेमा तीन र चितवनमा दुई जनाको मृत्यु भएको हो ।
बाकेको नेपालगञ्जबाट बकर इदमा रमाईलो गर्दै पौडी खेल्न भनि गएका ३ जना युवाको कोहलपुर नगरपालिका १० चटारको डुडुवा खोला नहरमा डुबेर मृत्यु भएको बताईएको छ ।
मृत्यु हुनेमा नेपालगञ्ज उपमहानगरपालिका–११ श्रृष्टि हल नजिक बस्ने १६ वर्षीय अरिब जसगढ, सोही ठाउँका १७ वर्षीय अरमान जसगढ र सदरलाइन बस्ने १८ वर्षीय रासिद जसगढ छन् । नहरबाट अन्य दुई जनालाई उद्धार गरेको प्रहरीले जनाएको छ ।
यसैगरी चितवनको भरतपुर महानगरपालिका–२ क्षेत्रपुरका १६ वर्षीय अंकित जोशी र १४ वर्षीय विवेक शर्माको पनि नहरमा डुबेर मृत्यु भएको छ ।
बुधबार साझ क्षेत्रपुरको खुल्ला चौरमा क्रिकेट खेलेर नजिकै रहेको नहरमा हातखुट्टा धुने क्रममा विवेक चिप्लिएर नहरमा खसेका थिए । नहरमा खसेका साथीलाई बचाउन जाने क्रममा अंकित पनि बगेका थिए ।
उनीहरु नहरमा बेपत्ता भएको खबर पाएपछि प्रहरीले खोजी गर्दा २०० मिटर तल नहरबाट उद्धार गरी उपचारका लागि भरतपुर अस्पताल पुर्याईएको थियो । उपचारका क्रममा उनीहरुको साँझ मृत्यु भएको प्रहरीले जनाएको छ ।
