श्रावण १६- बर्दियाको राजापुरमा महिलामाथि छुरा प्रहार भएको छ । राजापुर नगरपालिका वडा नम्बर ५ त्रिवेणी बजार काँटी झप्ती बस्ने ३० वर्षीय बिनिता चौधरीमाथि आज बिहान ८ः३० बजे छुरा प्रहार भएको हो । राजापुर नगरपालिका वडा नम्बर ५ मा रहेको आफ्नै एग्रोभेटमा बसेको बेला राजापुर नगरपालिका वडा नम्बर ५ कै ३२ वर्षीय प्रभु चौधरीले छुरा प्रहार गरेका हुन । छुरा प्रहारबाट बिनिता चौधरी घाइते भएकी छिन । घाइते बिनिता चौधरीका अनुसार छुरा लिएर आएका प्रभु चौधरीले तेरो लोग्ने खोइ, कहाँ छ नत्र तेरो छोरीलाई मार्छु भन्दै ८ वर्षकी छोरीलाई छुरा प्रहार गर्ने क्रममा रोक्दा बिनिता चौधरीको हात र पेटमा चोट लागेको छ । यस सम्बन्धमा अनुसन्धान कार्य भइरहेको राजापुर प्रहरीले जनाएको छ ।
