ललितपुरको ग्वार्कोमा ट्याक्सीमाथि बस पल्टिदा तीनजना घाइते भएका छन् । आज बिहान करिब ९ बजेतिर बिएन्डबी अस्पताल नजिकै ट्याक्सीमाथि बस पल्टिदा तीनजना घाइते भएका हुन् ।
घाइतेको बिएन्डबी अस्पतालमा उपचार भइरहेको छ । घाइते हुनेमा ट्याक्सी चालक हेटौंडाका २७ वर्षीय सन्जोग घिसिङ, मोटरसाइकल चालक भक्तपुर घरका ३८ वर्षीय आशिष श्रेष्ठ र महाहालक्ष्मी नगरपालिका–५ बस्ने ५० वर्षीय माइकल भन्ने नकलबहादुर महर्जन रहेका छन् ।
घाइतेमध्ये दुई जना डिस्चार्ज भइसकेका छन् । बस सातदोबाटोबाट ग्वार्कोतर्फ जाँदै गरेको र विपरीत दिशाबाट ट्याक्सी आउँदै थियो । बा ३ ख ४४४० नम्बरको बस बा २ ज ६०१ नम्बरको ट्याक्सीमाथि पल्टेको प्रहरीले जनाएको छ ।
बस अनियन्त्रित भएर ग्वार्कोबाट आउँदै गरेको माछा बोकेको डिआइ गाडीलाई ठक्कर दिएर ट्याक्सीमाथि पल्टिएको प्रहरीले जनाएको छ ।
